ಪ್ರೆಸ್ ಕ್ಲಬ್ ಆಫ್ ಬೆಂಗಳೂರು ಮತ್ತು ಕರ್ನಾಟಕ ರಾಜ್ಯ ಡಿಜಿಟಲ್ ಮೀಡಿಯಾ ಅಸೋಸಿಯೇಷನ್ ಸಹಯೋಗದಲ್ಲಿ ಪತ್ರಕರ್ತರಿಗೆ ನೇತ್ರ ತಪಾಸಣಾ ಶಿಬಿರ

 " ಧನುರ್ಮಾಸ - ಒಂದು ಚಿಂತನೆ "

" ದಿನಾಂಕ :17.12.2024 ಮಂಗಳವಾರ  -  13.01.2025 ಸೋಮವಾರದ ವರೆಗೆ ಧನುರ್ಮಾಸ "

ಧನುರ್ಮಾಸದ ವಿಷಯದಲ್ಲಿ....

" ಆಗ್ನೇಯ ಪುರಾಣ " ದ 52ನೆಯ ಅಧ್ಯಾಯದಲ್ಲಿ ಹೀಗೆ ಹೇಳಿದೆ......

ಧನುರ್ಮಾಸದ ಉಷಃ ಕಾಲದಲ್ಲಿ ಶ್ರೀ ಹರಿಯನ್ನು ಅರ್ಚಿಸಿದರೆ ಅವನು ಸಂಪ್ರೀತನಾದ ಭಕ್ತರಿಗೆ ಅಕ್ಷಯವಾದ ಅಭೀಷ್ಟಗಳನ್ನು ಕೊಡುತ್ತಾನೆ ಈ ವಿಷಯವು ಸತ್ಯ. 

" ಆಗ್ನೇಯ ಪುರಾಣೇ ದ್ವಿಪಂಚಾಶದಧ್ಯಾಯೇ "... 

ತಥಾ ತತ್ರೈವ ಧನುರ್ಮಾಸ 

ವಿಷಯೇ ದ್ವಿಪಂಚಾಶದಧ್ಯಾಯೇ.. 

ಧನುರ್ಮಾಸೇ ಹರಿಃ ಪ್ರೀತ 

ಉಷಃ ಕಾಲಾರ್ಚನೇ ಧ್ರುವಮ್ ।

ದದಾತ್ಯಾಭೀಷ್ಟಮಕ್ಷಯಂ 

ಸತ್ಯಮೇವ ಬ್ರವೀಮಿ ತೇ ।।

ಧನುರ್ಮಾಸದಲ್ಲಿ ಉಷಃ ಕಾಲದಲ್ಲಿ ಸ್ನಾನ ಮಾಡಬೇಕು. 

ಶ್ರೀ ಹರಿಯನ್ನು ಚೆನ್ನಾಗಿ ಪೂಜಿಸಬೇಕು. 

ಮೊಸರು ಮತ್ತು ಹೆಸರು ಬೇಳೆಯ ಹುಗ್ಗಿಯನ್ನು ಶ್ರೀ ಜನಾರ್ದನನಿಗೆ ಸಮರ್ಪಿಸಬೇಕು.

ಉಷಃ ಕಾಲೇ ಧನುರ್ಮಾಸೇ 

ಸ್ನಾತ್ವಾ ಸಮ್ಯಗ್ ಜನಾರ್ದನಮ್ ।   

ಸಮಭ್ಯರ್ಚ್ಯ ಚ ಮುದ್ಗಾನ್ನಂ

ದಧ್ನಾ ಸಹ ನಿವೇದಯ ।।

ಯಥಾ ಶಕ್ತಿ ಪ್ರಾತಃ ಕಾಲದಲ್ಲಿ ಬ್ರಾಹ್ಮಣರಿಗೆ ಭೋಜನ ಮಾಡಿಸಬೇಕು. 

ಇದರಿಂದ ಭಕ್ತನು ಇಹದಲ್ಲಿ ಸಕಲ ಭೋಗಗಳನ್ನು ಅನುಭವಿಸಿ ಅನಂತರ ವಿಷ್ಣುವಿನ ಸ್ಥಾನವಾದ ವೈಕುಂಠವನ್ನು ಹೊಂದುವನು. 

ಭೋಜ್ಯ ದ್ವಿಜವರ್ಯಾಂಶ್ಚ 

ಪ್ರಾತಃ ಕಾಲೇ ಯಥಾ ಬಲಮ್ ।

ಭುಕ್ತ್ವೇಹ ಸಕಲಾನ್ ಭೋಗಾನ್ 

ಪ್ರಾಪ್ಸ್ಯೆಸೇ ವೈಷ್ಣವಂ ಪದಮ್ ।।

" ಧನುರ್ಮಾಸದ ವೈಶಿಷ್ಟ್ಯ "

ಧನುರ್ಮಾಸದಲ್ಲಿ ಉಷಃ ಕಾಲದಲ್ಲಿ ಎದ್ದು ಸ್ನಾನಾದಿಗಳನ್ನು ಮಾಡಿ; ಪರಮಾತ್ಮನನ್ನು ಪೂಜಿಸಿ; ಮೊಸರು - ಶು೦ಠಿ ಇವುಗಳಿಂದ ಮನೋಹರವಾದ; ತುಪ್ಪ - ಸಕ್ಕರೆ - ಯಾಲಕ್ಕಿಗಳಿಂದ ಯುಕ್ತವಾದ; ನೆಲ್ಲೀಕಾಯಿ - ಗಡ್ಡೆಗಳಿಂದ ಕೂಡಿದ ಹುಗ್ಗಿಯನ್ನು ದೇವರಿಗೆ ಸಮರ್ಪಿಸಬೇಕು. 

ಜ್ಞಾನಿಯಾದವನು ಬ್ರಾಹ್ಮಣರಿಗೆ ಭೋಜನ ಮಾಡಿಸಬೇಕು. 

ಹೀಗೆ ಮಾಡಿದವನು ಯಾವ ಇಷ್ಟಾರ್ಥಗಳನ್ನು ಬಯಸುತ್ತಾನೋ ದುರ್ಲಭವಾಗಿದ್ದರೂ ಅವೆಲ್ಲವನ್ನೂ ಪಡೆಯುತ್ತಾನೆ. 

ಮುಂದೆ ಅವನು ಯೋಗಿಯಾಗಿ; ಜ್ಞಾನಿಯಾಗಿ; ಐಶ್ವರ್ಯವಂತನಾಗಿ ಜನ್ಮ ಜನ್ಮಾಂತರಗಳಲ್ಲಿಯೂ ವೈಷ್ಣವನಾಗಿ ಹುಟ್ಟುತ್ತಾನೆ. 

" ಆಗ್ನೇಯ ಪುರಾಣದಲ್ಲಿ ಧನುರ್ಮಾಸ ಪೂಜೆ ಮಾಡದಿದ್ದರೆ ದೋಷ " ಹೇಳಿದ್ದಾರೆ. 

ಆಕರಣೇ ಪ್ರತ್ಯವಾಯ ಉಕ್ತಃ ತತ್ರೈವ -

ಉಷಃ ಪೂಜಾಂ ಧನುರ್ಮಾಸೇ 

ಯೋ ನ ಕುರ್ವೀತ ವೈಷ್ಣವೀಮ್ ।

ಸಪ್ತ ಜನ್ಮ ಸು ರಿಕ್ತಃ ಸ್ಯಾತ್ 

ಕ್ಷಯ ರೋಗೀ ಚ ಮೂಢಧೀಃ ।।

ಯಾವನು ಧನುರ್ಮಾಸದಲ್ಲಿ ಶ್ರೀಮನ್ನಾರಾಯಣನಿಗೆ ಉಷಃ ಕಾಲದ ಪೂಜೆಯನ್ನು ಮಾಡುವುದಿಲ್ಲವೋ ಆ ಮೂರ್ಖನು ಏಳು ಜನ್ಮಗಳಲ್ಲಿ ಬಡವನಾಗುತ್ತನೆ ಮತ್ತು ಕ್ಷಯ ರೋಗಿಯಾಗಿಯೂ ಹುಟ್ಟುತ್ತಾನೆ.

ಆಚಾರ್ಯ ನಾಗರಾಜು ಹಾವೇರಿ 

ಗುರು ವಿಜಯ ಪ್ರತಿಷ್ಠಾನ