ಬೆಂಗಳೂರು, ಆ 26 - ಕನ್ನಡ ಸಂಸ್ಕೃತಿಯ ಮಹಿಳಾ ಕೂಟ (ರಿ) ವು, ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ಸಹಕಾರಡೊಡನೆ ಅಗಸ್ಟ್ ತಿಂಗಳ ವಿಶೇಷ ಕಾರ್ಯಕ್ರಮದ ಅಂಗವಾಗಿ ಕೆ. ವಸಂತ ಕುಮಾರ್ ರಚಿತ ಭಕ್ತಿ ಪ್ರಧಾನವಾದ 'ವೈರಾಗ್ಯ ನಿಧಿ ಅಕ್ಕ ಮಹಾದೇವಿ' ನಾಟಕವನ್ನು ಪ್ರದರ್ಶಿಸಲಾಯಿತು.
ನಗರದ ಇಂದಿರಾನಗರ ಕ್ಲಬ್‌ನ ಕಬಿನಿ ಹಾಲ್‌ನಲ್ಲಿ ಕನ್ನಡ ಸಂಸ್ಕೃತಿಯ ಮಹಿಳಾ ಕೂಟದ ಕಲಾವಿದರು ಶ್ರೀಮತಿ ಜಯ ರೇವಣ್ಣಸಿದ್ದಯ್ಯರವರ ನಿರ್ದೇಶನದಲ್ಲಿ ನಾಟಕವನ್ನು ಯಶಸ್ವಿಯಾಗಿ ಪ್ರದರ್ಶಿಸಿದರು.
ನಾಟಕದಲ್ಲಿನ ಸಂಭಾಷಣೆ ಹಾಗೂ ಸನ್ನಿವೇಶಗಳ ಮೂಲಕ, ಹೆಚ್ಚಿನ ಸಂಖ್ಯೆಯಲ್ಲಿ ಆಗಮಿಸಿದ್ದ ಪ್ರೇಕ್ಷಕರನ್ನು ಭಕ್ತಿ ಮಾರ್ಗದ ಮೂಲಕ ಲೋಕ ಕಲ್ಯಾಣಕ್ಕಾಗಿ ಶ್ರಮಿಸಿದ ಮಹನೀಯರ ಜೀವನದ ಪರಿಚಯ ಮಾಡಿಸಿ, ಅವರ ಮನಗಳಲ್ಲಿ ಭಕ್ತಿ ಮಾರ್ಗದ ಚಿಂತನೆ ಮೂಡಿಸುವ ಮನೋಜ್ಞ ಪ್ರದರ್ಶನ ನೀಡಿದ ನಾಟಕವು ಪ್ರೇಕ್ಷಕರ ಮನ ಗೆದ್ದಿತು.
ಕಾರ್ಯಕ್ರಮದ ಉದ್ಘಾಟನೆಯನ್ನು ನಾಟಕಗಳ ನಿರ್ದೇಶಕರಾದ ಶ್ರೀಮತಿ ಶಾರದ ನೆರವೇರಿಸಿದರು. ಸರಳ ಮುನಿರೆಡ್ಡಿರವರು ಅಧ್ಯಕ್ಷತೆ ವಹಿಸಿದ್ದರು. ಶ್ರೀಮತಿ ಶೋಭ ಮಹಾದೇವ್, ಶ್ರೀಮತಿ ಸುಧಾಗೌಡ, ಶ್ರೀಮತಿ ಸವಿತ ಮುದ್ದಣ್ಣ ಮುಂತಾದವರು ಉಪಸ್ಥಿತರಿದ್ದರು.
-min.png)